'Dʋ ‑blea 'de 'blʋajei 'a 'nynɔ 'ble nɔ" ɛ
45
Kore 'a "nynuu 'a 'dʋ ʋʋ "nyɩa bleʋn 'a klaa", ‑si' ‑plʋ mɛ nyɔ ɔ 'bleeɛ 'ʋn. ‑Ɛɛ toa nyʋ ba 'a ‑tɩ' kmaa' 'a "jru 'a "ti na'.
2 'Ma pɛe a crɛ' 'de wlu 'dɔe 'a ‑tɩ' 'ʋn,
'ma nʋʋdɩ ‑teɛ Tʋ "bo 'a ‑tea',
‑wɛe 'ma mɩɩɔ 'je craa‑ craa‑ nʋ
ka ‑cɛi" nmɔ i 'a 'crɩ tu nɩa.
3 ‑Ɩn ‑nmɔ "jrii ‑ɩn je nyʋ ‑wee'‑ ‑sii,
wlu 'dɔe ‑a ‑wlʋ 'de ‑ʋn ‑wɔn,
ɛmɛ tɩ Kea po ‑ʋn "diwan‑ 'wɩ 'oo 'wɩ ‑wee'‑ 'di.
4 Tʋ ‑fɔn' i klaa", ‑ɩn bla ‑ma ‑cnɛ 'ɛ wlʋ 'di,
ɛmɛ ‑nɩ ‑ma "jrii nmɔa' ke ‑ma cian"‑ ke.
5 'De ‑ma "ikmaa' 'ʋn ɛ, ‑ɩn kpa tʋ 'a "jru.
‑Ɩn ‑ja 'de ‑ma tʋ ‑fɔn' soo"‑ "kpei.
Tɔ' "i ‑tɩ o, kupeɛ' nyɔ nɩa' o, "isrɛa o ‑ɩn ‑fɔn' ɩa' tʋ.
‑Wɛe nyʋ ‑wee'‑ 'je ‑ma nʋʋdɩ 'a kpa po,
‑wɛe ‑ma diiansʋn 'je tʋ 'a "jru kpa.
6 Sɩn ‑nɩa 'je 'mɩmɩ 'blʋajei 'a tʋnyʋ 'a 'dooɛ 'ʋn cɛn,
'de ʋʋ 'je 'blae 'wla 'de ‑ʋn ‑sɔn.
7 'Oo Kea, ‑ma Tʋ"bodɛ 'nɩ jeejee,
ɛ nɩɛ 'kmʋ 'de nɔ" 'oo nɔ" ‑wee'‑ "klein 'di,
‑ma 'pee 'je sʋn "srɛi.
8 ‑Ma ‑jeɛ dɛ ‑srɛai" 'a "dia, dɛsaʋn a nyaa ‑mii',
ɛmɛ ‑tɩ 'oo Tʋ "bo, ‑ma Kea mɛ ‑nʋ ‑ʋn 'blʋajei 'ʋn,
ɛ poɛ ‑ʋn 'mʋa‑ nʋ cna "jru,
‑wɛe ɛ 'je ‑ma "dia ɛ je ‑ʋn "dɛi ‑wi" ‑sii.
9 'Miir, aloɛsɩ kanɛlɩ mɩ
‑ɩa 'nʋ 'dɔe a ji 'de ‑ma 'ʋnpaadɩ kwii.
'De ‑ma Tʋ "bo ‑gbu doɛ nynɩ ‑pɛɛa 'di 'bo Selisalɛmʋ
bleedʋ 'dɔe 'a nʋ ‑ʋn 'mʋa‑ "i.
10 Nynʋkpae' nynuu ‑wlʋa Tʋ "bo ‑gbu 'di ɛ,
ʋʋ ‑kaan' ‑ʋn ‑dei', ‑wɛe Tʋ "bo 'a 'nynɔ
ʋʋa ‑pɛɛdɩ nɩa 'sani nyna i 'de ‑ma diian o.
11 A po doun" i, 'ma 'nynɔkpao ju,
a ‑gbʋn 'nɔ a ‑te' doun", a "mae aa' 'cɛ ke
aa' ‑gbu" ‑sɔn nyʋ o.
12 Aa' "jrii nmɔa' ‑sa Tʋ "bo pɛe 'di,
‑jɛ ɔ nɩa aa' 'Beɔ 'jaa, ‑mɛ a 'jeɔ wɔn.
13 ‑Aa "i 'bɛɛ ‑tɩ 'ʋn ɛmɛ ‑tɩ
tʋnyʋ ‑ʋʋ ‑nɩa "wliiɛ jeʋn klae" ‑nɩ 'de Tii a mu
‑paan'‑ dɩ kwa "jiia' ʋʋ 'jea ‑ʋn ja,
‑wɛe ‑aa tɔ' 'je ʋʋpʋ‑ "kpei nɩ‑.
14 Tʋ "bo 'a 'nynɔkpao ju paa ʋʋa' 'sani bai"
‑ɛɛ fan' 'ʋn ‑wɛe ʋ pa 'e Tʋ "bo 'a 'Beɔ ‑gbu 'di.
15 Ʋ paa "bai ‑ɛɛ 'crɩjri ‑tiai" 'ʋn
‑wɛe ʋ ke ʋ "dɛi ‑wi" ‑kaan' ʋ 'dei,
‑wɛe ʋʋ kpʋ Tʋ "bo "i tooa'.
16 Ʋʋa bleɛ 'mʋa‑ nʋ dʋ ʋʋ je ʋʋpʋ‑ "juɛi kɔn
ʋʋ je ʋʋpʋ‑ 'de Tʋ "bo o ‑gbu" 'di kpa.
17 'Oo 'beɔ, ‑ma "nynuu a muɛ ʋʋ "bo ‑wi" ‑kɔo "siia
'de nya, 'wɩ jrɛ' 'di ‑wɛe ʋʋ 'je 'blʋajei 'a "nynuu nɩ‑
'de 'blʋa ‑wee'‑ "klein "kpei.
18 'Ma muɛ ‑ʋn 'nynɩ ‑saa' 'de ‑sʋn 'oo ‑sʋn 'di.
Ɛmɛ ‑tɩ nyʋ ‑wee'‑ "klein 'je ‑ma 'nynɩ "i 'bɛɛ‑ mamaʋ 'sʋ.